【由呢一刻起，樓價一定會跌？！】

樓價長升長有，個個星期都有破頂價出現，未上車嘅朋友係唔係已經絕望呢？唔使怕，仙仔話畀你知「由呢一刻起」，樓跌一定會跌！ 可能你會問「由呢一刻起」，即係幾時，答案就係當股市持續下跌個一刻！點解咁講？因為兩者關係密不可分！

事實上，股市自2015年初見頂下跌至2016年初，足足跌咗整整一年先見底回升！同時期，代表樓價走勢嘅中原城市領先指數，亦係2015年年中見頂下跌，至2016年年中先見底回升！仙仔將中原城市領先指數同恒生指數走勢圖擺埋一齊比大家睇：

2015年至2018年3月走勢圖

你唔難發現，原來傳統智慧話樓市走勢比股市行慢幾個月，原來真係好準架！聰明人，相信你睇返「由呢一刻起」，應該唔難估點解啦？無錯，就係如果股市已經喺33,484點見咗牛市大頂，樓市遲早跟跌！點解嘅？有三大利淡原因畀大家參考！

1.資金持續流出，港匯走弱
有留意港匯嘅朋友,，應該有留意到近期港匯已經非常接近弱方保證7.85，原因係資金自2017年起持續流出，引致港匯持續走弱至今。背後主因係因為美國聯儲局近年收水，並展開加息周期，但香港竟然無跟隨加息，引致美國同香港息差擴闊，國際投資者賣港元買美元，以達到套利目的。睇睇近3年港匯走勢：

2.金管局出手，隨時加息
國際投資者持續嘅套利活動愈來愈活躍，引發資金持續流出，而香港喺聯繫匯率制度下，當港匯觸及弱方保證7.85時，金管局就需要出手以捍衛聯繫匯率，以貨幣發行局買入港元作市場操作，咁貨幣基礎就會收縮，引致利率上升。當加息出現，其他因素不變之下，資產嘅合理價格就會下跌。仙仔搵咗政府嘅一幅圖表畀大家了解整個市場操作原則係點：

3.羊群心理，恐慌出現
投資市場，總會有時出現恐慌，引致急升或急跌，而股市同樓市就更常見！最近香港置業嘅調查，有64%受訪者表示想係未來12個月入市買樓，比例創有紀錄以來8季新高，而有意入市作換樓用途的受訪者佔比亦近40%！仙仔覺得恐慌心理已經出現！而近期多個業主反價，買家都立即買入，明顯係驚樓價會再升，怕遲買貴幾球。

總結嚟講，只要股市同樓市關係性高，而你又相信恒生指數已經係1月見咗頂，資金流出、香港加息升溫，加上恐慌出現，樓價未來幾個月或者「由呢一刻起」已經見頂！

P.S. 提提大家，只要所有未上車嘅朋友齊心唱淡樓市，利用仙仔嘅理據，齊力擊倒業主，等佢哋恐慌，樓價大跌不是夢了！所以，快啲share呢篇分析文章，令更多人知道！

P.P.S. 如果有能力而又需要買樓自住，學超人話齋，隨時可以買嘅。