【賣相會發達？柯達推加密相片+虛擬貨幣！】

虛擬貨幣Bitcoin就聽得多，炒賣Bitcoin賺錢發達大有人在，早前仙仔講過利用區塊鏈技術養雞，估唔到美國上市公司柯達宣佈1月底將首次代幣發行(ICO)虛擬貨幣柯達幣(KODAKCoin)消息後，股價急升4倍，柯達股東率先發財！至於大家點樣賣相賺虛擬貨幣？仙仔話畀你知！

加密相片保護版權

柯達表示會創立KODAKOne服務平台，利用區塊鏈(blockchain)技術畀創作人upload作品，並為作品加密，一來減少註冊時間同成本，二來作品擁有人紀錄可以永遠保留，保護創作人權益。然後，創作人可以利用KODAKOne服務平台售賣作品，包括相片同影片。

賣相賺KODAKCoin

平台會以柯達幣(KODAKCoin)交易，創作人可以將KODAKCoin兌換成其他貨幣套現。大家可能會問KODAKCoin價值係點樣定價？答案就係由市場決定，透過市場力量定價，即係好似Bitcoin咁，分分鐘每個KODAKCoin嘅價值可以升上天！對創作人嚟講，除咗賣相賺錢，仲可以賺埋KODAKCoin升值，想唔發達都難喇！(當然要有人買你嘅相先XDD)

點樣加入賣相行列

柯達仲聲稱KODAKOne平台會定期主動喺網上搜尋侵權情況，並且會自動幫創作人採取行動去保障佢地嘅權益，一旦發現有未經許可使用圖片嘅情況發生，系統會自動幫創作人追回應得嘅報酬，呢鋪實吸引到唔少人加入平台！

想立即加入KODAKOne平台賣相行列？柯達預計Beta版嘅KodakOne平台會喺2018第四季推出，而完整嘅商業版本就target喺2019年第二季推出。