【不解溫柔的終點是離婚】

仙仔最近睇到專欄理財作家李兆波Simon一篇文章叫做「結婚照的終點是床下底」，內文講到結婚照真正睇嘅時間唔多，不單止唔值得花費幾萬蚊去影，分分鐘相都未睇完就離婚收場。如果用經濟學去解釋，究竟講唔講得通呢？！

文章其中一段：「有朋友分享，建議想結婚的年輕人不要花太多錢在拍婚紗照，原因是看婚紗照的時間不長，過了此段時間以後便不看了，放進櫃內，床下底，迷你倉等，有時候甚至未看完或未看夠便分開了。」

仙仔大膽推斷Simon口中嘅朋友應該係男性，而且善於理財，覺得結婚相係無價值，寧可慳番啲錢，拎去投資，令日後生活更富庶，相信佢係深深明白金錢嘅時間價值(Time Value of Money)。

簡單解釋一下，金錢(即貨幣)嘅時間價值係指貨幣隨著時間嘅流逝而會有所增值。假設大家依家有5萬蚊，然後拎住呢5萬蚊去投資，每年平均回報係10%，10年後大家會有幾多錢？

算式：$50,000 x (1+10%)^10 = $129,687

嘩，5萬喺10年後增值咗近1.6倍，有成13萬！咁樣好似抵過拎去影結婚相，然後睇幾次就收埋係床下底喎！不過，呢個正正就係大多數男性嘅思維，太過自我同理性，忽略另一半嘅想法，不解溫柔。

事實上，女性點解鍾意影靚相(特別係年輕時)？因為女性心底裡知道，佢哋嘅青春只會不斷貶值(depreciation)，隨著時間嘅流逝而會變成一文不值，呢樣仙仔叫做青春嘅時間價值(Time Value of Bloom)。簡單舉例，假如青春現值5萬，每年貶值10%，10年後嘅青春值幾錢？

算式：$50,000 x (1-10%)^10 = $17,434

無錯，短短10年，青春已經貶值65%，大家都唔難想像到，再過10、20年，女人嘅青春仲剩幾多呢？所以，女人只想喺青春最值錢嘅時間時，盡可能留住美好一刻，因為機會錯過咗就係錯過咗。

可能你會話，男人都會老，咪一Q樣囉！錯，大錯特錯，男人由20出頭，愈老愈有味，個種中年佬味，稱之為成熟，魅力更勝年輕。撫心自問，十個男人，九個鍾意年輕貌美嘅女人。相反，十個女人，九個鍾意成熟嘅男人。

無可否認，適當地節省金錢，然後用嚟投資係會令財富增值，但係有一樣sad but true 嘅事實，就係女人嘅青春只會不斷depreciation，唔會再返到轉頭，所以影結婚相係有必要的，唔係滿足女人嘅貪慕虛榮之心，而係了解女人對價值嘅諗法！俗語有話，待嫁嘅女仔係最靚嘅，所以影結婚相嘅意義係留住青春，留住最美的一刻！唔通去到60歲先影咩！

仙仔相信，真正離婚變成終點嘅原因，往往就係因為男人不解溫柔…