上回提到電訊數碼(6033.HK)主要經營：(i)流動電話及預付SIM咭零售銷售相關服務；(ii)流動電話分銷相關服務；(iii)提供傳呼及其他電訊服務；及(iv)向新移動通訊SUN Mobile(公司擁有40%權益及香港電訊擁有60%權益嘅聯營公司)提供營運服務。啱啱就公布咗半年業績，重點如下：
- 整體業務表現理想，半年收入上升18.1%至6.9億，溢利上升19%至6,173萬
- 零售業務收入大幅增長50.8%至3.6億(2016年2.4億)，佔總收入約52.5%
- SUN Mobile月費調整同客戶增加，收入增長15.2%至創新高1.7億，佔總收入約24.6%
- 策略性地縮減傳呼服務同Mobitex服務，呢部分收入就下降11.3%至3,665萬
- 維持每季派息，中期派息為$0.05
仙仔總括電訊數碼呢份中期業績呢講，三隻字：好到爆！點解嘅？
眾所周知流動通訊行業越來越大競爭性，特別係香港寬頻以MVNO形式加入流動通訊行業，造成行業出現割喉式減價戰，無論係香港電訊、數碼通或和記電訊都出現業績增長呆滯或甚至倒退！
減價戰出現最有利就係低端市場，特別係有市場一哥香港電訊支持嘅電訊數碼，銀彈充足，應戰香港寬頻嘅一浪浪攻勢，成功打響名堂，客戶同知名度都雙雙增加，以收入創新高足以證明！
當香港電訊同數碼通都以市場缺乏受歡迎嘅手機以致手機零售銷售收入大幅下跌，偏偏電訊數碼嘅零售銷售表現相反，大幅上升50.8%，可以話係剃對手眼眉！所以話，有啲公司手機賣得差，係Marketing問題，唔好賴地硬。
先前都提過電訊數碼己重返預付SIM咭(儲值卡)市場，未來又一增長亮點，加上市場少有嘅每季派息股可以吸引一班息魔，仙仔覺得電訊數碼只係啱啱開始進入快速增長期，未來市值倍升至30億都唔奇！
沒有留言:
發佈留言