【和電派特息業續又靚仔，但真係咁簡單？】

和電（215）公佈咗2018年全年業績，睇新聞標題真係靚仔到不得了😋 等到花兒也謝了嘅特別息終於都有得派啦！每股派80仙特別息，連埋期末股息3.2仙，一次過收83.2仙息，以收市價$3.1計，有成26%，認真和味！ 第二個亮點就係全年賺多82% ！

哇哇哇點解咁利害嘅，勁過晒啲同業！仙仔我硬係覺得有啲野，於是打開份報告睇睇啦！一睇原來得啖笑，報告頭幾段有一句已經拆解晒我嘅疑問啦！

就係呢句「來自利息收入的額外效益令股東應佔溢利增加 82%，」點解賺多咁多其實就係靠上年賣咗固網業務嘅現金去收息賺返嚟嘅！

試諗下佢今次派晒現金特別股息2019年仲靠乜嘢嚟收息呢！唔計呢筆，再仔細啲睇佢嘅業務，今年嘅APRU 跌咗5%，EBIT 更加係跌咗15%😱睇到呢度咁大家都估到2019嘅業績可想而知會係點啦！

之但係又唔洗咁灰機，長和系之前都有派特別股息嘅前科！2017年電能第一次公布派特別息之後嗰日裂口高開超過10%，消息公布後嗰10零日個價最勁比未公佈之前升超過20%嫁！但當然啦電能係電能和電係和電，純歷史紀錄只供參考(帶返個頭盔先☺️)