【牛市已完？股神+大行+數據對決！】

Round 1 股神對決：華爾街之狼 vs 神準大好友
有「華爾街之狼」同「股壇狙擊手」之稱嘅對沖基金大鱷艾肯(Carl Icahn)警告金融市場將發生史無前例嘅「大地震」！點解會「大地震」？華爾街之狼覺得係因為近年指數基金同交易所買賣基金ETF盛行，當中大量基金係以槓杆或非實物形式運作，已經形成一個巨大泡沫！情況就好似2008年次按咁，隨時爆煲！所以佢呼籲投資者唔好輕視呢幾日嘅「地震先兆」，因為市場正在發出危險訊號。

神準大好友沃頓商學院金融學教授西格爾(Jeremy Siegel) 自2009年起一直睇好美股，每次震倉都呼籲投資者持貨，並成功預言道指見25,000點！佢覺得今次只係大調整，原因係之前升得太多同太快！係基本因素強勁之下，呼籲投資者唔好「被震走」加息只係一個藉口！最重要係西格爾覺得而家股市已調整至合理階段，可以開始入貨！

Round 2 基金對決：瑞信大摩 vs 滙豐高盛
瑞信同大摩都相信港股未見底，原因係美股急挫對亞太區股市已由風險演變成威脅，同埋港股近年已經升咗好多，估值都唔便宜，所以相信大市仲有下跌空間。大摩仲話恒生指數短線要調整至介乎28350至30000點先有望見底。

滙豐證券同高盛睇法就較因為樂觀，話根據過去美股數據，曾6次出現三日內股指調整10%嘅情況，但往後幾日都會回穩，甚至大反彈。相信港股宏觀及企業基本因素仍然穩健，調整後投資價值已經浮現，可受惠於大媽資金南下支持，亦唔相信亞太區股市牛市升浪已經完結喎。

Round 3 數據對決：短線支持 vs 長線形態

港股今次上升浪要追溯返2016年12月，足足升咗1年多啲！每次調整60天或100天平均日線圖都會出現支持，並反彈再創高位！今日恒生指數啱啱好下試60天平均日線約30,400點，而100天平均日線就約29,559點，嚟梗呢幾日係反彈定下試都有可能，不過如果睇好，理應唔跌穿100天平均日線。

長線剛剛出現熊市開始先兆！點解嘅？事實上睇返每次股災或大跌市都同時出現三個情況：1. 急升、2. 高位大成交、3. 急跌。參考2015年嘅大跌市前夕，走勢出奇地同今次相似，兩者都係同時出現急升同成交大升！依家嘅急跌相信只係大跌市嘅開始，之後將會繼續跌，當然過程中會有技術反彈啦！