【有個慳妹女友好幸福？】

《大時代》中嘅慳妹(周慧敏飾)同方展博(劉青雲飾)愛得刻骨銘心，慳妹樣樣嘢都要計住，慳得就慳，但當佢知道方展博有困難，竟然主動拎曬成副身家幫手！

假如你女友係慳妹，又有呢種無條件嘅信任，男友/老公們又夫復何求呢？除咗話慳妹女友可以出手幫你，仲有平時同佢出街，男士們荷包都可以慳唔少，買樓上車易好多啦！快啲tag你啲慳家朋友入嚟睇！

講開慳妹嘅慳錢性格，原來香港都好多人都係咁！點解？眾所周知儲值卡通常收費比較平同靈活，係慳手機上網錢嘅好辦法！根據HKT香港電訊(6823.HK)同和記電訊(215.HK)截至2017年6月止嘅六個月業績公告，分別有105萬同159萬用戶係用儲值卡，多到你唔信。仙仔周圍問朋友，大槪4分1人用儲值卡。

最近SUN Mobile宣佈推出新品牌Flex-Mobile，重投儲值卡市場！好多人以為SUN Mobile係屬於電訊數碼 (6033.HK)，但事實上佢係同HKT合資嘅公司(HKT佔60%，電訊數碼佔40%)，由電訊數碼營運，主打平價流動通訊服務市場。

講到呢到，醒目仔女應該會諗到SUN Mobile近年愈來愈出名，而家推出新品牌，咪有增長亮點囉！但問題係投資HKT定電訊數碼好？等仙仔話你知，電訊數碼近75%收入源自為SUN Mobile提供營運服務並同時銷售手機！相反，SUN Mobile佔HKT盈利只係九牛一毛。

如果睇好SUN Mobile前景，梗係揀電訊數碼！點解？

1. 電訊數碼營運SUN Mobile前，曾經透過電訊品牌Rabbit賣儲值卡，可謂經驗老到

2. 儲值卡市場年銷售額數以十億計，只要搶10%市佔，足以令收入同盈利大升

3. HKT以SUN Mobile迎戰來勢洶洶嘅香港寬頻(1310.HK)嚟保持低端流動通訊市場市佔，有大水喉照實搵到客

4. 電訊數碼最近1年每季派息，自然好易吸引一班息魔，以10月13日收市價$3.39計，息率5.3%

5. 根據圖表，電訊數碼低位形成雙底支持，如果升穿下降軌阻力約$3.78，有望再次挑戰高位

仙仔提提大家，投資有風險，如果SUN Mobile唔夠其他電訊商抽，分分鐘會出現盈利倒退，所以盡力而為。唔投資，都可以透過慳錢去「賺錢」，不妨齊齊做慳妹！